ភ្នំពេញ៖ រាជរដ្ឋាភិបាលនៃព្រះរាជាណាចក្រជប៉ុននឹងផ្ដល់ជំនួយជាវ៉ាក់សាំងការពារជំងឺកូវីដ-១៩ចំនួន៣០ម៉ឺនដូសបន្ថែមដល់ព្រះរាជាណាចក្រកម្ពុជា ដើម្បីរឹតចំណងមិត្តភាពរវាងប្រទេសទាំងពីរបន្ថែមទៀត។ នេះបើតាមការលើកឡើងរបស់ឯកអគ្គរាជទូតជប៉ុនប្រចាំកម្ពុជាលោក មិកាមិ ម៉ាសាហ៊ីរ៉ូ ។

លោក មិកាមិ ម៉ាសាហ៊ីរ៉ូ បានថ្លែងថាវ៉ាក់សាំងទាំង៣០ម៉ឺនដូសនេះនឹងត្រូវដឹកជញ្ជូនមកដល់រាជធានីភ្នំពេញនៅថ្ងៃទី១៩ ខែធ្នូ ឆ្នាំ២០២១ខាងមុខក្រោមយន្តការCOVAXរបស់អង្គការយូនីសេហ្វ និងអង្គការសុខភាពពិភពលោក។

លោក មិកាមិ ម៉ាសាហ៊ីរ៉ូ បានថ្លែងថា៖ «ខ្ញុំសង្ឃឹមថាជំនួយនេះនឹងរួមចំណែកបន្ថែមទៀតដល់ជំហានឆ្ពោះទៅរកការងើបឡើងវិញនៃសង្គម និងសេដ្ឋកិច្ច ក៏ដូចជាកាត់បន្ថយការព្រួយបារម្មណ៍មួយចំនួនរបស់ប្រជាជនកម្ពុជា» ។

ប្រទេសជប៉ុនជាអ្នកផ្តល់ជំនួយការពារជំងឺកូវីដ-១៩មួយដល់កម្ពុជាគិតរហូតមកដល់ពេលនេះប្រទេសនេះបានផ្ដល់វ៉ាក់សាំងការពារកូវីដ-១៩ប្រមាណ១លានដូសរួចរាល់ហើយ និងបានផ្ដល់ជំនួយសរុបប្រមាណ៦០លានដុល្លារដល់កម្ពុជាដែលរួមមានការផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រតាមរយៈអង្គការអន្តរជាតិនានាសម្រាប់វិធានការទប់ស្កាត់ការចម្លងជម្ងឺតាមព្រំដែន ក៏ដូចជាការផ្ដល់បរិក្ខារសម្រាប់ដឹកជញ្ជូន និងរក្សាទុកវ៉ាក់សាំងឲ្យបានត្រឹមត្រូវផងដែរ។

ជប៉ុនក៏បានផ្ដល់ជាកម្ចីប្រមាណ ២២៧លានដុល្លារអាមេរិក ដែលត្រូវបានយកទៅប្រើប្រាស់ក្នុងការគាំទ្រហិរញ្ញវត្ថុដល់ប្រជាជនដែលរងផលប៉ះពាល់ដោយសារកូវីដ១៩ និងសម្រាប់ការពង្រឹងប្រព័ន្ធសុខាភិបាលនៅកម្ពុជាផងដែរ៕